સુપ્રીમ કોર્ટે વડાપ્રધાન નરેન્દ્ર મોદીની બાયોપિક ‘પીએમ નરેન્દ્ર મોદી’ અંગે કોઈપણ નિર્ણય લેતા પહેલા ચૂંટણીપંચને આ ફિલ્મ એકવાર જોવા માટે જણાવ્યું છે. ઉલ્લેખનીય છે કે ચૂંટણીપંચે શુક્રવારે ચૂંટણી દરમિયાન આ ફિલ્મની રીલીઝ પર રોક લગાવી દીધી હતી.
ચૂંટણીપંચના આદેશમાં કહેવામાં આવ્યું હતું કે એવી કોઈપણ પ્રચાર સામગ્રી કે પોસ્ટર જે કોઈ ચૂંટણી ઉમેદવારની ઇમેજને પ્રત્યક્ષ કે પરોક્ષ રીતે બઢાવી-ચડાવીને દર્શાવે, તેવા કોઈ કન્ટેન્ટને આચારસંહિતા દરમિયાન ઇલેક્ટ્રોનિક મીડિયામાં ન દર્શાવવું જોઈએ.
ચૂંટણીપંચના આ નિર્ણય વિરુદ્ધ ફિલ્મ નિર્માતાઓએ સુપ્રીમ કોર્ટમાં અરજી દાખલ કરી છે. નિર્માતાઓ તરફથી હાજર વકીલ મુકુલ રોહતગીએ સુપ્રીમ કોર્ટમાં જણાવ્યું કે ચૂંટણીપંચે ફિલ્મ જોયા વગર જ તેની રીલીઝ પર રોક લગાવી દીધી.
