પશ્ચિમ બંગાળમાં બીજેપીએ ઐતિહાસિક પ્રદર્શન કરીને 42માંથી 18 લોકસભા સીટ્સ પર કબ્જો મેળવ્યો છે, પરંતુ ક્યારેક લેફ્ટ અને હવે મમતાના ગઢમાં તેની આ જીત તેનાથી પણ અનેકગણી વધારે છે. ચૂંટણી પરિણામો પછી વિધાનસભાવાર વોટ્સનું વિશ્લેષણ રાજ્યના મુખ્યમંત્રી મમતા બેનર્જીને પરેશાન કરી નાખવાના સંકેત આપી રહ્યું છે. ઉલ્લેખનીય છે કે રાજ્યમાં સત્તારૂઢ તૃણમૂલ કોંગ્રેસને 42માંથી માત્ર 22 સીટ્સથી જ સંતોષ કરવો પડ્યો છે.
વિધાનસભાવાર ચૂંટણી આંકડાઓ પર નજર નાખીએ તો પાછલી લોકસભા ચૂંટણીમાં બીજેપીને માત્ર 28 વિધાનસભા વિસ્તારોમાં લીડ મળી હતી જ્યારે આ વખતની ચૂંટણીમાં 128 વિસ્તારોમાં કમળ ખિલ્યું છે. બીજી બાજુ વર્ષ 2014માં 214 વિસ્તારોમાં વધારો મેળવનારી ટીએમસી હવે ફક્ત 158 વિસ્તારોમાં જીતી છે. પશ્ચિમ બંગાળમાં કુલ 294 વિધાનસભા સીટ્સ છે અને રાજ્યમાં 2021માં વિધાનસભા ચૂંટણી થવાની છે. વર્ષ 2016માં થયેલી વિધાનસભા ચૂંટણીમાં ટીએમસીને 211, લેફ્ટને 33, કોંગ્રેસને 44 અને બીજેપીને માત્ર 3 સીટ્સ મળી હતી.
વોટશેરમાં પણ બીજેપીએ લોકસભા ચૂંટણીમાં શાનદાર પ્રદર્શન કર્યું છે. ટીએમસીએ જ્યાં 43.3 ટકા વોટશેર મેળવ્યો છે જ્યારે બીજેપીને 40.3 ટકા વોટ્સ મળ્યા છે. બીજેપીને કુલ 2,30,28,343 વોટ્સ મળ્યા જ્યારે ટીએમસીને 2,47,56,985 વોટ્સ મળ્યા છે.
પરિણામો પછી હાઇ એલર્ટ મોડમાં મમતા
પશ્ચિમ બંગાળમાં લોકસભા ચૂંટણીમાં ખરાબ પ્રદર્શન અને બીજેપીના 129 વિધાનસભા વિસ્તારોમાં લીડ કર્યા પછી હવે રાજ્યના મુખ્યમંત્રી અને તૃણમૂલ કોંગ્રેસ નેતા મમતા બેનર્જીએ પોતાની પાર્ટીની અંદર આઘાત કરનારા લોકોની શોધ શરૂ કરી દીધી છે. સીએમ મમતા હવે હાઇ એલર્ટ મોડમાં આવી ગયા છે. તેમણે ત્યાં સુધી કહી દીધું છે કે હવે તેઓ પાર્ટીના કામ પર વધુ ધ્યાન આપશે.
રાજ્યમાં બીજેપીના શ્રેષ્ઠ પ્રદર્શને મમતાને અંદરથી હલબલાવી નાખ્યા છે. ટીએમસીના એક સૂત્રએ જણાવ્યું કે ભગવા પાર્ટી રાજ્યની અન્ય 60 સીટ્સ પર માત્ર 4 હજાર વોટ્સથી હારી છે જે તેમની પાર્ટી માટે વધુ ચિંતાની વાત છે. મમતાએ તેમની પાર્ટીના વરિષ્ઠ નેતાઓને બ્લોક લેવલ પર એવા નેતાઓની ઓળખ કરવા માટે કહ્યું છે જેમણે સીપીએમથી બીજેપી અને કેટલાક મામલાઓમાં ટીએમસીથી બીજેપીને વોટ ટ્રાન્સફર કરાવવામાં મદદ કરી. ટીએમસીના આંતરિક સર્વેમાં સામે આવ્યું છે કે ટીએમસીને જંગલમહેલ અને નોર્થ બંગાળમાં ગરીબ લોકોના વોટ્સ નથી મળ્યા. આ વિસ્તારમાં આદિવાસી વધારે છે.
