વડાપ્રધાન નરેન્દ્ર મોદીએ પોતાના મંત્રીમંડળના 57 સભ્યો સાથે ગુરૂવારે શપથ લીધા પછી શુક્રવારે કેબિનેટ મંત્રીઓને મંત્રાલયોની જવાબદારી સોંપી દીધી છે. તેમાં પહેલીવાર કેબિનેટ મંત્રી બનેલા બીજેપી અધ્યક્ષ અમિત શાહને ગૃહમંત્રી બનાવવામાં આવ્યા છે. આ ઉપરાંત રાજનાથ સિંહને સંરક્ષણ મંત્રી બનાવવામાં આવ્યા છે. ઉલ્લેખનીય છે કે ગઇ મોદી સરકારમાં રાજનાથ સિંહ પાસે ગૃહ મંત્રાલય હતું. જ્યારે ફિલ્મ નિર્માતા અને ફેડરેશન ઑફ વેસ્ટર્ન ઇન્ડિયા સિને એમ્પલોઇઝ (FWICE)ના મુખ્ય સલાહકાર અશોક પંડિતે શુક્રવારે વિપક્ષ પર નિશાન સાધીને એક ટ્વિટ કર્યું.
અશોક પંડિતે અમિત શાહનો એક ફોટો શેર કરીને ટ્વિટર પર લખ્યું, ‘ટુકડે ટુકડે ગેંગ, એવોર્ડ વાપસી ગેંગ, ધ ખાન માર્કેટ ગેંગ, મૈં આ રહા હૂં.’ ઉલ્લેખનીય છે કે વડાપ્રધાન નરેન્દ્ર મોદીએ પોતાની બીજી ઇનિંગ્સ માટે પોતાના 5 મોટા સિપાહીઓ પસંદ કરી લીધા છે, જેમાં રાજનાથ સિંહ, અમિત શાહ, પિયુષ ગોયલ, ડૉ. એસ જયશંકર અને નિર્મલા સીતારામનના નામ સામેલ છે.
